2Ti 4 | GbrGAW | STEP | A Ntuce nu mi zhin ho gargadi n Shekwoyi abye, n Kristi Yesu yi, n wo ɓei da aza wye-wye yi n na azafiyi owa n wyihoi nyin. Esa n wo ɓei ɓe nwo begyi-yi.

2 Timothy 4

Bulus Shaula Zafun Nya

1 A Ntuce nu mi zhin ho gargadi n Shekwoyi abye, n Kristi Yesu yi, n wo ɓei da aza wye-wye yi n na azafiyi owa n wyihoi nyin. Esa n wo ɓei ɓe nwo begyi-yi. 2 Zhin Shewoyi ɓeda waʼazi n esayi vinya, Esa n ha bwa bednu n sayi vinya. Zhin eho aza aba, esa n bednu nyi kwo n tna bednu, ha gnakni ɓa esa vinya n kwo kunce, gaɓa kala ɓa zhin ɓemana n esai vinya, nu ɓa n Shekwoyi ɓedayi.

3 Ntu ge esa ɓelo n aza to ɓei shan gaiciya tnubua knan, ama ɓa ɓei zan laɓa ɓai zan a malami zanshi n ɓa ɓa gna ɓa oɓo n ɓaye ɓa wo. 4 Ɓato ɓei kna ɓeda tnubua n Shekwoyi ɓeda dan, ama ɓa ɓei vi oɓa anubo zhin zokwo bwi-bwi nya.

5 La mi gni to wo wahala dna n ho ɓa sin ntu n Dagayi ɓo m. Gni aza je ɓe n cei n Kristi aba. To fya ɓeho n tna zhinyi n kwo kunce ha zhin.

6 Mi da ɓeye gama mi to gnilo n mi ɓa bmaho zhin, Emisa la gasi, Esa fyewyi mi ɓa wan zokwo maloʼshe. 7 Miku okun sun n mwa ntu n emi Dagayi ɓo, Dna n kwo vinya miku ɓefyece zhin. Nsaiye esa lasi n mi ɓa fa kun sunɓo ma sun. 8 N Eshe mi rawani pmi milo n Dagayi Alkali gaiciya da ɓei gami ewyi n wo ɓei jezeɓe n cei. To ge emi n mi gmanyin ama har na zai ɓe n ɓa sase n wyetuyi ge ɓa pmi owo jezeɓe lo n Jesun.

Zokwodna kmaknayi

9 Mi gyi ho wye ɓe npye. 10 Gama Dimas nla miya, wa wo anyi nya shakpe wa lo Tassalunika, Kiristis wo du Galatiya, Titus wa lo Dalmatiya. 11 Luka nu bwa ce gnilo n miyi, Gniɓe n Markus yi esa n ha ɓe n cei gama mi n wo apmayi lo.

12 Mila Tikiku tnu n Afisus. 13 Esa n ha ɓe, to ɓo ze amwi ha ɓemi n jekpeyi n mi ɓei ya zhi n Taruwasa nyi m N mi ɓei yazhi n Karbus emi zado aba nyi, njesun n mi a litafiyi, tun-baga a takarda opa nya.

14 Iskandari Epyada sinknabyeyi nya waku mi wu anyi n mwa. Dagayi ɓa tawo. 15 Ama zhin peceiye n woi, gama wo ɓei la gni apa-pa n nya yi n yi ɓei da.

16 Esa kmisunyi n na aɓei ɓe n mi na alkali abye ada mi owa ezaho-zahoi to ɓei gni n, aza vinya ɓola busi, mi n na awyetu yilo ata ba laifi ye n ɓa tukwon. 17 Ama Dagayi ɓei gnisun n miyi wa gna mi esa ma zhin waʼazi tna edna anyi vinya ɓa wo. Wa gni mi n na agaba ʼgbe. 18 E, Dagayi ɓa gni mi n na aɓo nukwoyi vinya, wa lo mi dna n wo ebemi eshe nya. Mwa-mwa kwo kunsun n Shekwoyi nyalo-nyalo. Amin.

19 Ɓi, Biskila gna n Aikla yi n na aai n ɓa fi n Onisifurus puwa nyi. 20 Arastus dnalo n Korintus, mafa Turufinus dna n Militus nyasayi sanwo.

21 Zhin atna ha ɓe n ya kafin vinyikwo, Afbulus saho ami lo ɓedo n Budis yi n Linus yi n Kalafidiya yi n na azayi vinya. 22 Dagayi Yesu Kristi wo kunsun nfye zafun yi.